«Վրաստանի դեմոկրատական նախաձեռնություն» (GDI) հասարակական կազմակերպությունը (ՀԿ), որ պաշտպանում է ընդդիմադիր «Մթավարի արխի» հեռուստաընկերության տնօրեն Նիկա Գվարամիայի իրավունքները, հայտարարութուն է տարածել, ըստ որի՝ Թբիլիսիի դատախազությունը Վրաստանի պետական անվտանգության ծառայության (ՊԱԾ) ֆայլերի տարածման գործով Գվարամիային տուժողի կարգավիճակ է տվել:
«Մինչ դատախազության կողմից տուժող ճանաչելու որոշումը, մենք 2022 թվականի նոյեմբերի 18-ին հարցում ենք կատարել Նիկա Գվարամիայի մասին: 2023 թվականի հունվարի 10-ին դատախազությունից խնդրել ենք Գվարամիային տուժողի կարգավիճակ շնորհել: Օրենքով սահմանված ժամկետում մեր վերջին հարցման պատասխանը չստացանք, Նիկա Գվարամիային տուժող ճանաչելու վերաբերյալ բողոք ենք ներկայացրել, բողոքը ներկայացրել ենք Վրաստանի գլխավոր դատախազին»,- նշել է ՀԿ-ն:
Ի դեպ, Գվարամիան կալանքի տակ է 2022 թվականի մայիսի 16-ից։ Նա դատապարտվել է 3 տարի 6 ամիս ազատազրկման՝ «Ռուսթավի 2» հեռուստաընկերությունը տնօրինելու ժամանակ լիազորությունները չարաշահելու մեղադրանքով։ Հարկ է նշել, որ Գվարամիան այս մեղադրանքը չի ընդունում։
Նշենք, որ 2021 թվականի սեպտեմբերի 12-ի ուշ գիշերը լրատվամիջոցները դեպի անպաշտպան կայքի հղում են ստացել, որը պարունակում էր հազարավոր փաստաթղթեր՝ տեքստային ֆայլեր, տեսա և աուդիո ձայնագրություններ, լուսանկարներ: Սրանք հեռախոսային խոսակցությունների, սոցիալական ցանցերում նամակագրությունների, հանդիպումների, քաղաքական տրամադրությունների հավաքածու էին. այս ամենը, հավանաբար, ՊԱԾ-ը հավաքել և արխիվացրել էր տարիների ընթացքում:
Դատախազությունը սեպտեմբերի 14-ին հետաքննություն է սկսել գաղտնալսումների վերաբերյալ լրատվամիջոցների տարածած տեղեկատվության վերաբերյալ։
«Մեդիա օմբուդսմեն» և «Վրաստանի դեմոկրատական նախաձեռնություն» ՀԿ-ները պաշտպանում են ձայնագրություններում հայտնված լրագրողների իրավունքները։ Տասնյակ լրագրողներ արդեն ստացել են տուժողի կարգավիճակ։
Գաղտնալսումների նոր սկանդալ Վրաստանում. բացահայտվել են հոգևորականների անձնական կյանքի մանրամասներ
