Վրաստանի էկոնոմիկայի և կայուն զարգացման նախարարության փոխանցմամբ, քիմիական արտադրության միջազգային խոշորագույն ընկերություններից մեկը՝ Indorama Corporation-ը՝ Վրաստանի կառավարության աջակցությամբ, մուտք է գործել Վրաստան։
Ըստ տվյալների՝ էկոնոմիկայի և կայուն զարգացման նախարարության «Արտադրիր Վրաստանում» գործակալության ակտիվ ներգրավմամբ՝ սինգապուրյան ընկերությունը, որն ունի ավելի քան 160 ձեռնարկություն աշխարհի 38 երկրներում և ունի ավելի քան 45 հազար աշխատող, ձեռք է բերել Ռուսթավիի ազոտական պարարտանյութեր արտադրող ձեռնարկությունը։
Նշվում է, որ Indorama Corporation-ը տարիներ շարունակ ուսումնասիրել է Վրաստանի ներդրումային միջավայրն ու հնարավորությունները, որում ակտիվորեն ներգրավված է եղել «Արտադրիր Վրաստանում» գործակալության ներդրումային թիմը։
«Արտադրիր Վրաստանում»-ի տնօրեն Միխեիլ Խիդուրելիի խոսքով, այս ներդրումը կլինի Վրաստանում խոշորագույններից մեկը։ Ըստ նրա՝ առաջիկա տարիներին կորպորացիան նախատեսում է զգալի ֆինանսական ռեսուրսներ ներդնել ձեռնարկության արդիականացման, զարգացման և արտադրության ընդլայնման ուղղությամբ:
