Վրաստանի խորհրդարանի նախագահ Շալվա Պապուաշվիլին այսօր խորհրդարանում հյուրընկալել է Հայաստանի Հանրապետության Ազգային ժողովի նախագահ Ալեն Սիմոնյանին և նրան ուղեկցող պատվիրակությանը։ Տեղեկությունը տարածում է Պապուաշվիլիի ֆեյսբուքյան էջը:
Նշվում է, որ Սիմոնյանի այցը հատկապես կարևոր է, քանի որ այս տարի լրանում է Վրաստանի և Հայաստանի միջև դիվանագիտական հարաբերությունների հաստատման 30-ամյակը։ 30 տարի շարունակ երկու երկրների միջև կապերն ու բարեկամությունը խորացել են, ինչը շահեկան արդյունք է տվել Վրաստանին և Հայաստանին, ինչպես նաև ողջ տարածաշրջանին:
«Հուսով եմ, որ այս տասնամյակների ընթացքում մենք ստեղծել ենք ամուր հիմք, որի վրա մեր ապագա սերունդները կկարողանան ապրել բարիդրացիական և եղբայրական համակեցության մեջ։ Հանդիպմանը քննարկել ենք օրենսդիր մարմնի՝ ներառյալ բարեկամության խմբերի և ոլորտային հանձնաժողովների միջև կապերի հետագա ամրապնդումը»,- գրել է Պապուաշվիլին:
Պապուաշվիլին ողջունել է, Հայաստանի խորհրդարանական պատվիրակության այցի շրջանակներում երկու խորհրդարանների արտաքին և մշակույթի հանձնաժողովների միջև համագործակցության հուշագրի ստորագրումը։ Ըստ նրա՝ այս համաձայնագրերը կնպաստեն երկրների և ժողովուրդների միջև առկա հարուստ մշակութային հարաբերությունների հետագա խորացմանը։
Ըստ տեղեկության՝ հանդիպմանը քննարկվել է նաև տարածաշրջանում տիրող իրավիճակը։
«Վրաստանի ու Հայաստանի ու ընդհանրապես Հարավային Կովկասի պետությունների անցյալը, ներկան ու ապագան սերտորեն փոխկապակցված են: Վրաստանը շարունակում է իր պատրաստակամությունը հայտնել որպես միջնորդ Հայաստանի և Ադրբեջանի միջև, որպեսզի հարավկովկասյան տարածաշրջանը դառնա խաղաղության և համագործակցության օրինակ։
Հուսով եմ, որ մենք բոլորին և առաջին հերթին մեր երիտասարդ սերունդներին ցույց կտանք, որ նույնիսկ ամենադժվար խնդիրների դեպքում Հարավային Կովկասի ժողովուրդը կարող է խելամտությամբ և փոխադարձ համագործակցությամբ կառուցել խաղաղ ապագա»,- նշել է Պապուաշվիլին:
Հակամարտությունների կարգավորման հարցը՝ Ղարիբաշվիլի-Սիմոնյան հանդիպման օրակարգում
