Վրաստանի վարչապետ Իրակլի Ղարիբաշվիլին ազգային անվտանգության խորհրդի նիստ է հրավիրել, հայտնում է Վրաստանի կառավարության ֆեյսբուքյան էջը:
Նշվում է, որ հանդիպմանը քննարկվել են համաշխարհային և տարածաշրջանային անվտանգության միջավայրի կարևոր միտումները, Վրաստանի առջև ծառացած մարտահրավերները, ինչպես նաև ազգային մակարդակով հայեցակարգային փաստաթղթերի թարմացման գործընթացը։
Քննարկվել է նաև կրիտիկական ենթակառուցվածքների պաշտպանության ոլորտում իրականացվող բարեփոխումների ընթացքը և հայեցակարգային և իրավական դաշտի ստեղծման գործընթացը։ Ուշադրություն է դարձվել կարևոր ենթակառուցվածքային օբյեկտների ոլորտային ցուցակների կազմման գործընթացին:
Վարչապետի գլխավորությամբ կայացած ազգային անվտանգության խորհրդի նիստին մասնակցել են ազգային անվտանգության խորհրդի քարտուղար, ներքին գործերի նախարար Վախթանգ Գոմելաուրին և խորհրդի մշտական անդամներ՝ պաշտպանության նախարար Ջուանշեր Բուրճուլաձեն, ֆինանսների նախարար Լաշա Խուցիշվիլին, արտաքին գործերի նախարար Իլիա Դարչիաշվիլին, Պետական անվտանգության ծառայության ղեկավար Գրիգոլ Լիլուաշվիլին, հետախուզական ծառայության ղեկավար Շալվա Լոմիձեն և պաշտպանության ուժերի հրամանատար Գիորգի Մատիաշվիլին։
