Վրաստանի խորհրդարանի իշխող «Վրացական երազանք» կուսակցությունը որոշել է ստեղծել հակակոռուպցիոն բյուրո, որի հիմնական խնդիրն է լինելու խթանել կոռուպցիայի դեմ պայքարը։
Հակակոռուպցիոն բյուրոն կվերահսկի ընդհանուր հակակոռուպցիոն քաղաքականությունը սահմանող փաստաթղթի և ազգային հակակոռուպցիոն ռազմավարության իրականացումը, կհամակարգի նաև համապատասխան մարմինների, կազմակերպությունների և պաշտոնատար անձանց գործունեությունը։
Հակակոռուպցիոն բյուրոն հաշվետու է լինելու խորհրդարանին և միջգերատեսչական հակակոռուպցիոն խորհրդին։ Մասնավորապես, բյուրոյի ղեկավարը խորհրդարանին տարեկան հաշվետվությունը կներկայացնի, իսկ պարբերական հաշվետվությունները՝ միջգերատեսչական հակակոռուպցիոն խորհրդին։
Ըստ «Վրացական երազանքի»՝ հակակոռուպցիոն բյուրոյի ղեկավարի թեկնածուները կընտրվեն բաց մրցույթի հիման վրա՝ ստեղծված մրցութային հանձնաժողովի կողմից՝ պետական գերատեսչությունների և քաղաքացիական հասարակության ներկայացուցիչների մասնակցությամբ և կներկայացվի վարչապետին՝ պաշտոնում նշանակվելու համար։
«Մեր կողմից ամբողջությամբ պատրաստված օրենսդրական փոփոխությունները ծառայում են Եվրահանձնաժողովի 12 կետից բաղկացած ծրագրի 4-րդ կետի կատարմանը և Վրաստանին ԵՄ անդամակցության թեկնածուի կարգավիճակ տալուն»,- ասել է խորհրդարանի իրավական հարցերի հանձնաժողովի նախագահ Անրի Օխանաշվիլին։
