Վրաստանի վարչապետ Իրակլի Ղարիբաշվիլին Ադրբեջանի նախագահ Իլհամ Ալիևի հետ հանդիպման շրջանակներում անդրադարձել է Հայաստանի և Ադրբեջանի միջև հակամարտությանը և իր աջակցությունը հայտնել կոնֆլիկտի խաղաղ կարգավորմանը։
Ղարիբաշվիլիի խոսքով, հանդիպման ընթացքում ընդգծվել են Վրաստանի ու Ադրբեջանի միջև ռազմավարական գործընկերությունը և առևտրատնտեսական ուղղությամբ ինտենսիվ համագործակցությունը։
«Մենք նաև խոսեցինք Ադրբեջանի և Հայաստանի միջև պայմանավորվածության վերաբերյալ, խնդրի խաղաղ կարգավորման մասին։ Սա մեզ, իհարկե, մեծ հույս է տալիս, և ուզում եմ ընդգծել, որ Վրաստանի կառավարությունն ու ես պատրաստակամություն ենք հայտնում աջակցել կոնֆլիկտի խաղաղ կարգավորման ընթացքին, որը միասին ենք սկսել», — ասել է Ղարիբաշվիլին։
Վարչապետը նշել է, որ խաղաղությունն ու կայունությունը տարածաշրջանում ապահովում են տնտեսական զարգացումը․
«Վրաստանն ու Ադրբեջանը սերտորեն համագործակցում են արտաքին քաղաքականության ուղղությամբ և աշխատում են միասնական ուժերի հետ՝ հաղթահարելու նպատակով առկա մարտահրավերները։ Երկու երկրների միջև քաղաքական, տնտեսական, մշակութային և այլ տեսակի կապերի հետագա ամրապնդման պատրաստակամություն է հայտնվել», — նշվել է ասուլիսի ժամանակ։
