Թբիլիսիի քաղաքապետ Կախա Կալաձեն ասել է, որ ընդդիմությունը փորձում է Վակեի այգում տեղի ունեցածն օգտագործել քաղաքական նպատակներով:

Կալաձեն, սակայն, ոչինչ չի ասել իր քաղաքական պատասխանատվության և հրաժարականի մասին, ինչը նրանից պահանջում է հասարակության մի մասը։

Նա ասել է, եթե այդ գործում իր մեղավորությունը ապացուցվի, ապա պատրաստ է պատասխան տալ օրենքի առաջ։

«Ողբերգության օրվանից քաղաքացիները հեռուստատեսությամբ ցնցող հայտարարություններ է լսում կոնկրետ քաղաքական գործիչների կողմից։ Ափսոս, որ վրացական քաղաքականության մեջ դեռ կան մարդիկ, ովքեր փորձում են անգամ նման մեծ ողբերգությունն օգտագործել իրենց քաղաքական նպատակների համար»,- ասել է Կալաձեն։

Նշենք, որ հոկտեմբերի 13-ին, առավոտյան տեղեկություն տարածվեց, որ Թբիլիսիի Վակեի այգում՝ մուտքի մոտ, շատրվանների ավազան մտած երեխաները հոսանքահարվել են: Ավելի ուշ հայտնի դարձավ, որ հոսանքահարվելու հետևանքով վիրավորված 13-ամյա աղջիկը կլինիկայում մահացել է:

Հոսանքահարվելու հետևանքով դեռահասի մահից հետո քաղաքացիները հավաքվել են Թբիլիսիի քաղաքապետարանի մոտ ցույց և մոմավառություն կազմակերպել:

Ցավալի լուրին արձագանքել են Վրաստանի վարչապետ Իրակլի Ղարիբաշվիլին, Վրաստանի նախագահ Սալոմե Զոարաբիշվիլին, Թբիլիսիի քաղաքապետ Կախա Կալաձեն, ԿԳ նախարար Միխեիլ Չխենկելին, ընդդիմադիր, քաղաքական և փորձագիտական շրջանակները:

Համայն Վրաստանի կաթողիկոս-պատրիարք Իլիա II-ը ցավակցական հեռագիր է հղել Թբիլիսիի Վակեի այգում տեղի ունեցած ողբերգության կապակցությամբ։

Հարկ է նշել, որ Վակեի այգու վերանորոգված շատրվանների հանդիսավոր բացումը տեղի է ունեցել հոկտեմբերի 12-ին: «Գրինսերվիս+»-ը 13 մլն լարիի վերականգնողական աշխատանքներ է կատարել Վակեի այգում գտնվող շատրվանների վրա։ Մրցութային փաստաթղթերի համաձայն՝ ավարտված աշխատանքների վերջին ստուգումն իրականացվել է 2022 թվականի օգոստոսի 29-ին։

Վրաստանի ներքին գործերի նախարարությունը հետաքննություն է սկսել Քրեական օրենսգրքի 240-րդ հոդվածի 1-ին մասով, որը վերաբերում է անվտանգության կանոնների խախտմանը, ինչը հանգեցրել է առողջությանը պակաս ծանր կամ ծանր վնասի։