Համայն Վրաստանի կաթողիկոս-պատրիարք Իլիա II-ը ցավակցական հեռագիր է հղել Թբիլիսիի Վակեի այգում տեղի ունեցած ողբերգության կապակցությամբ։
Պատրիարքն իր ցավակցությունն է հայտնել հոսանքահարվելու հետևանքով մահացած 13-ամյա աղջկա՝ Մարիտա Մեփարիշվիլիի ծնողներին։
«Պարոն Դավիթ, տիկին Աննա, մեր սրտի ցավը մեծ է կատարված ողբերգության պատճառով։ Մենք աղոթում ենք փոքրիկ Մարիտա-Մարիամի անմահ, պայծառ հոգու համար: Աստված ձեզ օգնական»,- նշված է Իլիա II-ի ցավակցական հեռագրում։
Նշենք, որ երեկ առավոտյան տեղեկություն տարածվեց, որ Թբիլիսիի Վակեի այգում՝ մուտքի մոտ, շատրվանների ավազան մտած երեխաները հոսանքահարվել են: Ավելի ուշ հայտնի դարձավ, որ հոսանքահարվելու հետևանքով վիրավորված 13-ամյա աղջիկը կլինիկայում մահացել է: «Նյու Հոսփիթլս»-ի մանկական առողջության կենտրոնի ղեկավար Դավիթ Ցիբաձեի խոսքով՝ Վակեի այգում հոսանքահարումից տուժած երեխաներից մեկը դեռ միացված է արհեստական շնչառության սարքին:
Հոսանքահարվելու հետևանքով դեռահասի մահից հետո քաղաքացիները հավաքվել են Թբիլիսիի քաղաքապետարանի մոտ ցույց և մոմավառություն կազմակերպել:
Ցավալի լուրին արձագանքեցին Վրաստանի վարչապետ Իրակլի Ղարիբաշվիլին, Վրաստանի նախագահ Սալոմե Զուրաբիշվիլին, Թբիլիսիի քաղաքապետ Կախա Կալաձեն, ԿԳ նախարար Միխեիլ Չխենկելին, ընդդիմադիր և քաղաքական շրջանակներ:
Հարկ է նշել, որ Վակեի այգու վերանորոգված շատրվանների հադիսավոր բացումը տեղի է ունեցել հոկտեմբերի 12-ին: «Գրինսերվիս+»-ը 13 մլն լարիի վերականգնողական աշխատանքներ է կատարել Վակեի այգում գտնվող շատրվանների վրա։ Ըստ մրցութային փաստաթղթերի՝ ավարտված աշխատանքների վերջին ստուգումն իրականացվել է 2022 թվականի օգոստոսի 29-ին։
Վրաստանի ներքին գործերի նախարարությունը հետաքննություն է սկսել Քրեական օրենսգրքի 240-րդ հոդվածի 1-ին մասով, որը ենթադրում է անվտանգության կանոնների խախտում, որը հանգեցրել է առողջությանը պակաս ծանր կամ ծանր վնասի։
