Բելառուսի նախագահ Ալեքսանդր Լուկաշենկոյի՝ Վրաստանից չվերահսկվող Աբխազիա կատարած այցը բողոքի ալիքի պատճառ դարձավ, դատապարտեցին ոչ միայն Վրաստանի իշխանություններն ու քաղաքական ընդդիմադիր դաշտի ներկայացուցիչները, այլև Վրաստանի գործընկեր պետությունները` նույնպես։
Եվրախորհրդարանի պատգամավոր Վիոլա ֆոն Կրամոնն ասել է, որ Լուկաշենկոյի այցը օկուպացված Աբխազիա հիշեցնում է, որ չարիքին հանդարտեցնելը միշտ հակառակ արդյունք է տալիս։
«Լուկաշենկոն ահաբեկիչ է, Պուտինի խամաճիկն է և ոչ լեգիտիմ կառավարիչ, որին չի ճանաչում Եվրամիությունը»,- ասել է եվրոպացի պատգամավորը։
Վրաստանում Լիտվայի դեսպան Էնդրյուս Կալինդրան ասել է, որ Լիտվան իր լիակատար աջակցությունն է հայտնում Վրաստանին։
«Բելառուսական ռեժիմի ղեկավար Ալեքսանդր Լուկաշենկոյի այցը Վրաստանի Աբխազիայի շրջան` վկայում է, որ Բելառուսն ու Ռուսաստանը չեն հարգում ՄԱԿ-ի կանոնադրությունը, տարածքային ամբողջականության և ինքնիշխանության սկզբունքը»,- նշել է դիվանագետը։
Վրաստանում Ավստրիայի դեսպան Թոմաս Միուլմանը հայտարարել է, որ դատապարտում է Բելառուսի նախագահ Ալեքսանդր Լուկաշենկոյի այցը օկուպացված Աբխազիա։
«Ավստրիան վճռականորեն աջակցում է Վրաստանի տարածքային ամբողջականությանը և ինքնիշխանությանը»,- ասել է Միուլմանը։
Վրաստանում Մեծ Բրիտանիայի դեսպան Մարկ Քլեյթոնի կարծիքով՝ Բելառուսի նախագահ Ալեքսանդր Լուկաշենկոյի այցը օկուպացված Աբխազիա` ՄԱԿ-ի կանոնադրության, Հելսինկյան եզրափակիչ ակտի և Վրաստանի ինքնիշխանության ու տարածքային ամբողջականության սկզբունքների անտեսման դրսևորում է։
«Միացյալ Թագավորությունը վճռական աջակցություն է հայտնում Վրաստանին այս հերթական սադրանքի լույսի ներքո»,- գրել է դիվանագետը։
ԱՄՆ Պետդեպարտամենտի խոսնակ Նեդ Փրայսի խոսքով՝ Միացյալ Նահանգները վճռականորեն աջակցում է Վրաստանի ինքնիշխանությանը և տարածքային ամբողջականությանը միջազգայնորեն ճանաչված սահմաններում։
Բելառուսի նախագահի այցը Աբխազիա բացահայտ առճակատում է Վրաստանի հետ. կարծիքներ
Լուկաշենկոյի քայլը խախտում է Վրաստանի օկուպացված տարածքների մասին օրենքը. Ղարիբաշվիլի
Խստորեն դատապարտում եմ Լուկաշենկոյի այցն Աբխազիա. Զուրաբիշվիլի
