Վրաստանի հաշտեցման և քաղաքացիական իրավահավասարության հարցերով նախարար Թեա Ախվլեդիանին ճանաչողական հանդիպում է ունեցել Վրաստանում Գերմանիայի Դաշնային Հանրապետության արտակարգ և լիազոր դեսպան Պիտեր Ֆիշերի հետ։ Այս մասին տեղեկացնում է պետնախարարի գրասենյակը։
Հանդիպմանը պետնախարարն ընդգծել է երկու երկրների միջև առկա գործընկերության և սերտ, բարեկամական հարաբերությունների կարևորությունը։
«Թեա Ախվլեդիանին շնորհակալություն է հայտնել դեսպանին Վրաստանի ինքնիշխանության, միջազգայնորեն ճանաչված սահմաններում տարածքային ամբողջականության և Վրաստանի եվրաինտեգրման հարցում Գերմանիայի ուժեղ աջակցության համար։ Հանդիպումն ընդգծեց Գերմանիայի կարևոր դերը հակամարտությունների խաղաղ կարգավորման գործում, ներառյալ միջնորդությունը և ներգրավվածությունը՝ նպաստելու պատերազմից քայքայված հասարակությունների միջև վստահության ձևավորմանը»,- ասված է տեղեկատվության մեջ։
Հաղորդագրության համաձայն՝ հանդիպմանը մանրամասն քննարկվել է Վրաստանի բռնազավթված շրջաններում մարդու իրավունքների և հումանիտար տեսանկյունից ծանր իրավիճակը։ Թեա Ախվլեդիանին դեսպանին տեղեկացրել է հաշտեցման տեսլականի մասին, որոնք ուղղված են հակամարտությունից տուժած բնակչության սոցիալ-տնտեսական պայմանների բարելավմանը։
