Հաղորդակցության ազգային հանձնաժողովի գնահատմամբ՝ «Ֆորմուլա», «Մթավարի արխի» և TV Pirveli հեռուստաընկերությունների հայտարարությունը՝ հաղորդակցության հանձնաժողովի կողմից իշխող «Վրացական երազանք»-ի բողոքն ընդունելու վերաբերյալ, հիմնավորված չէ։
Տարածված հայտարարության մեջ ասվում է, որ հաղորդակցության հանձնաժողովի ընդունած բոլոր որոշումները լիովին համապատասխանում են օրենքին, հետևաբար՝ չկա որևէ փաստարկ, որ հանձնաժողովի որոշումները սպառնում են խոսքի ազատությանը։
«Գործը վերաբերում է հեռարձակվող գովազդի օրինականությանը, որը կապ չունի խոսքի ազատության հետ։ Եթերում հեռարձակվող գովազդի տեղադրումն ունի օրենքով սահմանված հստակ կանոններ, որոնց հեռարձակողները քաջատեղյակ են։ Վիճաբանության մեջ ներգրավված հեռուստաընկերությունների ներկայացուցիչները դիմում են, որ վիճահարույց տեսահոլովակը պատկանում է սոցիալական, ոչ թե քաղաքական գովազդին, որի քննարկումը դուրս է Հաղորդակցության հանձնաժողովի իրավասությունից։ Օրենսդրության համաձայն՝ հեռարձակվող գովազդի տեղադրման պատշաճության որոշումը Հաղորդակցության հանձնաժողովի իրավասությունն է, հետևաբար և՛ սոցիալական, և՛ քաղաքական գովազդի եթերում տեղադրելու հարցը գտնվում է Հաղորդակցության հանձնաժողովի քննարկման տիրույթում», — ասված է հանձնաժողովի տարածած հայտարարության մեջ։
Նշենք, որ օգոստոսի 12-ին «Ֆորմուլա», «Մթավարի արխի» և TV Pirveli հեռուստաընկերությունները արձագանքել են «Վրացական երազանք»-ի Հաղորդակցության հանձնաժողովում ներկայացված բողոքին։ Նրանց գնահատմամբ՝ կառավարչական թիմի նպատակն իրենց պատժելն է խմբագրական քաղաքականության համար և ծանր ֆինանսական պատժամիջոցներ կիրառելը։
Խոսքը «Վրացական երազանք» կուսակցության՝ 2022 թվականի օգոստոսի 8-ին Հաղորդակցության հանձնաժողովում ներկայացված հայտարարության մասին է, որի հիման վրա պահանջում է «Ֆորմուլա», «Մթավարի արխի» և TV Pirveli հեռուստաընկերություններին՝ հունիսի 23-ից 24-ը «Տուն՝ դեպի Եվրոպա» տեսահոլովակը հրապարակելու համար ճանաչել որպես իրավախախտ։
