ACT հետազոտական և կառավարման խորհրդատվական ընկերության զեկույցում նշվում է, որ Վրաստանում ռուս զբոսաշրջիկների համար բարենպաստ բիզնես միջավայրի ստեղծումն ուղղակիորեն տնտեսական վտանգ է ներկայացնում տեղական բիզնեսի համար:
ACT-ը 2022 թվականի հունիսի 11-16-ն ընկած ժամանակահատվածում զբոսաշրջության հիմնախնդիրների վերաբերյալ բնակչության հարցում է անցկացրել։ Հետազոտությանը մասնակցել է պատահականության սկզբունքով ընտրված 18 տարեկանից բարձր Վրաստանի ավելի քան 800 քաղաքացի։
Զեկույցի համաձայն՝ հարցված բնակչության զգալի մասը՝ 84 տոկոսը, այս տարի ակնկալում է ռուս զբոսաշրջիկների հոսք դեպի երկիր, ինչը 70 տոկոսի մոտ անհանգստություն չի առաջացրել:
«Չնայած այն հանգամանքին, որ բնակչության զգալի մասը բացահայտ դժգոհություն չի հայտնում Վրաստանի առողջարանային շրջաններում հավաքվող ռուսաստանցի զբոսաշրջիկների մեծ թվից, նրանց մեծ մասը՝ 57 տոկոսը, կարծում է, որ Վրաստանի կառավարությունը պետք է սահմանափակի Ռուսաստանի քաղաքացիների բիզնեսը Վրաստանի տարածքում»,- նշված է զեկույցում։
Հարցվածների 40,6 տոկոսը Ռուսաստանը համարել է Վրաստանի թշնամին: 37,9 տոկոսը կարծում է, որ Վրաստանում Ռուսաստանի քաղաքացիների ստեղծած բիզնեսը մրցակցում է տեղական բիզնեսի հետ և դրա հետևանքով նվազեցնում է նրանց եկամուտները, իսկ 11,1 տոկոսն ասել է, որ Ռուսաստանը պատերազմ է մղում Ուկրաինայի դեմ:
«Գործընթացի զոհ են դառնում այն տնտեսվարողները, որոնք տարեցտարի սպասում են զբոսաշրջային սեզոնին, և որոնց տնտեսական հզորությունը կառուցված է տարվա ընթացքում սեզոնային եկամուտը բաշխելու սկզբունքով»,- նշված է ACT-ի զեկույցում։
ACT-ը գլոբալ հետազոտությունների և կառավարման խորհրդատվական ընկերություն է, որն աջակցում և լիազորում է ապագա առաջնորդներին և կազմակերպություններին իմաստալից փոփոխությունների համար: ACT–ի հատուկ կարողությունը տվյալների, գաղափարների և կարողությունների արժեքավոր արդյունքների վերածելն է: ACT-ի հիմնական ուշադրությունը զարգացող երկրների վրա է, քանի որ լավ են հասկանում նրանց խնդիրները և հստակ տեսնում են այնտեղի հսկայական ներուժը։ 3 մայրցամաքներում, ավելի քան 25 երկրներում, ACT-ը աջակցում է մասնավոր և հասարակական կազմակերպություններին կարևոր տնտեսական, սոցիալական կամ քաղաքական փոփոխություններ իրականացնելու համար։
