Բորջոմիի մունիցիպալիտետի Սակիրե գյուղում Ղրիմ-Կոնգո տենդից մինչև 45 տարեկան տղամարդ է մահացել։
Վրաստանի ընդդիմադիր «Լելո» կուսակցությունը հայտարարություն է տարածել, որում պահանջում է վիզային ռեժիմ մտցնել Ռուսաստանի Դաշնության և Բելառուսի քաղաքացիների համար։
Վրաստանի խորհրդարանի նախագահ Շալվա Պապուաշվիլիի խոսքով, Ռուսաստանի քաղաքացիների՝ Վրաստան մուտք գործելու դեմ արշավն այլատյացության տրամադրություններ է առաջացնելու։
Թբիլիսիի քաղաքապետ Կախա Կալաձեն՝ գնահատելով «Լելո» ընդդիմադիր կուսակցության առաջարկը, որը ենթադրում է Ռուսաստանի և Բելառուսի հետ վիզային ռեժիմի խստացում, նշել է, որ զբոսաշրջության զարգացումն առաջնային է երկրի համար։
Վրաստանի բիզնես դիստրիբյուտորների ասոցիացիայի ղեկավար Իվա Ճկղոնիան ասել է, որ Ռուսաստանից Վրաստան են ներմուծվում ամենաարագ, որակյալ և էժան ապրանքները:
Ձեթ արտադրող «Ալֆա» ընկերության կոմերցիոն տնօրեն Դավիթ Կիրվալիձեի խոսքով՝ համաշխարհային շուկայում արևածաղկի գնի նվազման պատճառով «Բարաքա» ձեթը վրացական շուկայում հնարավոր է մի փոքր էժանանա:
Վրաստանի սոցիալական ծառայությունների գործակալության կայքում հրապարակված վիճակագրության համաձայն՝ մեկ տարում կենսապահովման նպաստ ստացողների թիվն աճել է 19 տոկոսով։
Վրաստանի ազգային վիճակագրության ծառայության (Geostat) տվյալներով՝ 2022 թվականի առաջին 6 ամսում Վրաստան է ներմուծվել ընդհանուր առմամբ 202 հազար 367 մլն դոլարի դեղամիջոց:
Վրաստանի կրթության և գիտության նախարար Միխեիլ Չխենկելիի նախաձեռնությամբ Վրաստանի Շոթա Ռուսթավելիի անվան ազգային հիմնադրամը հայտարարել է կիրառական հետազոտությունների գիտական դրամաշնորհի նոր մրցույթ, որի նպատակով պետական բյուջեից հատկացվել է 3 մլն լարի (մոտ 1 մլն դոլար)։
Վրաստանի երրորդ նախագահ Միխեիլ Սաակաշվիլիի փաստաբան Վալերի Գելբախիանին այցելել է «Վիվամեդ» կլինիկայում գտնվող երրորդ նախագահին, որից հետո նշել է՝ Սաակաշվիլին ավելի լավ տեսք ունի:
«Թրանսփարենսի Ինթերնեշնլ-Վրաստան» (TI) հետազոտության համաձայն՝ այս տարվա մարտին, ապրիլին, մայիսին և հունիսին Վրաստանում գրանցվել է մոտ 6 400 ռուսական ընկերություն, ինչը 7 անգամ ավելի է 2021 թվականի տարեկան ցուցանիշից։
TI հետազոտության համաձայն՝ 2022 թվականին զգալիորեն աճել է Ռուսաստանի քաղաքացի հանդիսացող այցելուների թիվը Վրաստանում՝ հունվար-հունիսն ընկած ժամանակահատվածում երկիր է մուտք գործել 247 հազար ՌԴ քաղաքացի։
Գինու տնտեսագետների ամերիկյան ասոցիացիայի (AAWE) տրամադրած տեղեկատվության համաձայն՝ ԱՄՆ-ում Վրաստանից ներկրվող գինու 11,3 տոկոսն ունի օրգանական գինու սերտիֆիկատ, այդպիսով ամերիկյան շուկայում զբաղեցնում է առաջին տեղը հիմնական ներմուծող երկրների շարքում։
Վրաստանի Ազգային բանկը նոր որոշում է ընդունել՝ սպառողական վարկերի մարման առավելագույն ժամկետը, որը ներկայումս սահմանված է 4 տարի, նվազեցնել մինչև 3 տարի։
Եվ վերջում՝ Ազգային բանկի հրապարակած տվյալների համաձայն՝ սակարկությունների արդյունքում 1 ԱՄՆ դոլարի արժեքը դարձել է 2,7332 լարի, ինչ վերաբերում է եվրոյին, ապա դրա փոխարժեքը 2,7835 լարի է։
