Վրաստան-Ուկրաինա դիվանագիտական հարաբերությունների 30-ամյակին նվիրված միջոցառման ժամանակ Վրաստանում Ուկրաինայի գործերի ժամանակավոր ներկայացուցիչ Անդրեյ Կասյանովն անդրադարձել է երկու երկրների միջև տարբեր ոլորտներում համագործակցությանը։
Խոսելով Վրաստանում և Ուկրաինայում տեղի ունեցած պատերազմների ժամանակ փոխաջակցության մասին՝ նա նշել է, որ Ուկրաինան և՛ 90-ականների սկզբին, և՛ 2008 թվականին Ռուսաստանի հետ պատերազմում «եղբայրաբար կանգնած է եղել Վրաստանի կողքին», ուստի Վրաստանից ավելի մեծ աջակցություն էր ակնկալում։
«Այսօր, երբ Ռուսաստանը պատերազմ է սկսել Ուկրաինայում, մենք ակնկալում էինք, որ Վրաստանը կհետևեր Ուկրաինայի օրինակին և ավելի արդյունավետ օգնություն կցուցաբերեր. ցավոք, դա տեղի չունեցավ, ռազմավարական գործընկերության մասին մեր պատկերացումները, ցավոք, չհամընկան։
Մեր եղբայրական հարաբերությունների փորձը մեզ վստահեցնում է, որ Ուկրաինան ու Վրաստանը կշարունակեն առաջ շարժվել միասին՝ հանուն մեր ժողովուրդների պայծառ ապագայի»,- ասել է Կասյանովը։
