Եվրոպական խորհրդի որոշումից մեկ օր առաջ ԱՄՆ Հելսինկյան հանձնաժողովը կոչ է անում իր եվրոպացի գործընկերներին Ուկրաինայի և Մոլդովայի հետ միասին Վրաստանին ևս տալ թեկնածուի կարգավիճակ։
Այս մասին ասված է Հելսինկյան հանձնաժողովի նախագահ Բեն Քարդինի, համանախագահ Սթիվ Քոհենի, սենատոր Ռոջեր Վիկերսի և պատգամավոր Ջո Ուիլսոնի համատեղ հայտարարության մեջ։
Հայտարարության մեջ ասված է, որ բոլոր երեք երկրներին թեկնածուի կարգավիճակ շնորհելը նրանց հնարավորություն կտա պայքարել ընդհանուր եվրոպական երազանքի շրջանակներում։
«Մենք ողջունում ենք Եվրահանձնաժողովի պատմական որոշումը՝ առաջարկելու Ուկրաինային և Մոլդովային թեկնածուի կարգավիճակ: Բոլոր երկրներն ունեն ինքնիշխան իրավունք՝ ընտրելու իրենց դաշինքները և որոշելու իրենց արտաքին քաղաքական ուղեգիծը: Վրաց ժողովուրդը նույնպես տասնամյակների ընթացքում բազմաթիվ զոհաբերություններ է արել իր եվրոպական ինքնության համար, չնայած ռուսական ագրեսիայի մարտահրավերներին և ցավոտ բարեփոխումներին»,- ասված է հայտարարության մեջ։
Եվրախորհրդարանի սոցիալիստ և դեմոկրատ պատգամավորների առաջադիմական դաշինքից Յոզա Օլեկասը ևս աջակցություն է հայտնել Ուկրաինային, Վրաստանին և Մոլդովային ԵՄ թեկնածուի կարգավիճակ շնորհելուն:
Եվրախորհրդարանում բանավեճի ժամանակ նա շնորհավորել է Եվրահանձնաժողովին «օբյեկտիվ գնահատականի» համար և ասել, որ Ուկրաինան, Վրաստանը և Մոլդովան արժանի են ԵՄ թեկնածուի կարգավիճակին։
«Ամենից շատ՝ Ուկրաինան, որն այսօր պաշտպանում է եվրոպական արժեքները սեփական ժողովրդի կյանքի գնով։ Նրանք այլ կարևոր որոշումներ են կայացրել, օրինակ՝ վավերացնելով Ստամբուլի կոնվենցիան։ Մենք պետք է շարունակենք աջակցել Ուկրաինային ռազմական օգնություն տրամադրելու և ագրեսորի դեմ պատժամիջոցների խստացման հարցում»,- ասել է Օլեկասը։
Հատկանշական է, որ հունիսի 23-24-ը Բրյուսելում տեղի կունենա Եվրոպական խորհրդի նիստ, որի ժամանակ ԵՄ անդամ երկրների ղեկավարները վերջնական որոշում կկայացնեն Վրաստանի, Ուկրաինայի և Մոլդովայի թեկնածուական կարգավիճակի վերաբերյալ։
Հիշեցնենք՝ հունիսի 17-ին Եվրահանձնաժողովը խորհուրդ էր տվել Ուկրաինային և Մոլդովային թեկնածուի կարգավիճակ տալ՝ կից պայմաններով, իսկ Վրաստանի դեպքում՝ սահմանել այն նախապայմանները, որոնք երկիրը պետք է կատարի մինչև կարգավիճակ ստանալը։
Կարդացեք նաև՝
Եվրահանձնաժողովը չի աջակցում Վրաստանի՝ թեկնածուի կարգավիճակին
