Վրաստանի վարչապետ Իրակլի Ղարիբաշվիլին մայիսի 27-ին ելույթ ունենալով Վրաստանի խորհրդարանում, ասել է, որ Ռուսաստանի լայնածավալ ռազմական ագրեսիան Ուկրաինայի դեմ, իհարկե, միջազգային իրավունքի հիմնարար նորմերի և սկզբունքների, ինչպես նաև ՄԱԿ-ի կանոնադրության կոպիտ խախտում է, որն աննախադեպ մարտահրավեր է եվրոպական անվտանգության համար:
«Նախ ուզում եմ հակիրճ հիշեցնել մեր հասարակությանը՝ ընդդիմությանը, Վրաստանի կառավարության և խորհրդարանի համատեղ միջոցառումների մասին։ Կցանկանայի համառոտ և հստակ արտահայտել մեր դիրքորոշումը: Առաջին հերթին մենք հաստատում ենք մեր աջակցությունը Ուկրաինայի ինքնիշխանությանը և տարածքային ամբողջականությանը նրա միջազգայնորեն ճանաչված սահմաններում»,- ասել է Ղարիբաշվիլին
Վարչապետի խոսքով Վրաստանը պատերազմի առաջին իսկ օրվանից իր լիակատար համերաշխությունն է հայտնել Ուկրաինային և ուկրաինացի ժողովրդին, ինչը հաստատվում է երկկողմ կամ բազմակողմ ձևաչափերով համապատասխան քաղաքական և դիվանագիտական քայլերով.
«Այլ կերպ անհնար է, քանի որ մենք պատմական բարեկամություն ունենք Ուկրաինայի հետ, մեր երկրներն ունեն ընդհանուր եվրոպական և եվրատլանտյան նկրտումներ։ Բազմաթիվ հրապարակային հայտարարություններով մեր բարձրաստիճան պաշտոնյաները դատապարտել են Ռուսաստանի ռազմական ագրեսիան ինքնիշխան Ուկրաինայի դեմ»:
Ղարիբաշվիլին նաև նշել է, որ Վրաստանի խորհրդարանն առաջիններից մեկն էր, ով ընդունեց Ուկրաինայում ռազմական էսկալացիայի վերաբերյալ բանաձև՝ դատապարտելով ինքնիշխան պետության դեմ ցանկացած մտադրություն։
«Ապրիլի 6-ին Վրաստանի խորհրդարանական պատվիրակությունը՝ խորհրդարանի նախագահի գլխավորությամբ, մեկնել է Ուկրաինա և Գերագույն Ռադայի նախագահի հետ այցելել պատերազմից տուժած Բուչա և Իրպեն։ Միջազգային կազմակերպություններում մեր դիվանագիտական ներկայացուցչությունները, հատկապես վերջին զարգացումների լույսի ներքո, մշտապես իրենց աջակցությունն են հայտնում Ուկրաինային»,- ասել է Ղարիբաշվիլին
