Վրաստանում մեկնարկել է ֆերմերներին աջակցության ծրագրի փոխհատուցումների փուլը։ Վրաստանի կայուն զարգացման և էկոնոմիկայի նախարարության տրամադրած աջակցությունն ուղղված է այն հողագործներին, որոնք՝ ունեն հանրային ռեեստրում գրանցված առնվազն 0․25 և առավելագույնը 1 հեկտար հողատարածք։
Ծրագրից օգտվելու համար ֆերմերները պետք է ստուգեն իրենց հաշվին հավաքագրված միավորները Liberty բանկի պաշտոնական կայքի միջոցով, այնուհետև կապ հաստատեն բանկի ցանկացած մասնաճյուղ՝ գործող գյուղատնտեսական քարտն ակտիվացնելու կամ նոր քարտ ստանալու համար։
Ստուգելու համար հարկավոր է․
- անցնել հետևյալ հղումով,
- որոնման դաշտում հավաքել հողատիրոջ անձնական համարը (անձնագրի կամ նույնականացման քարտի)
- սեղմել որոնել կոճակը,
Եթե էկրանին կհայտնվեն հավաքագրված միավորները, ապա պետք է դիմել բանկին` ստանալու կամ ակտիվացնելու համար ագրոքարտը, եթե գրվում է` հաճախորդը չի գտնվել, ապա քաղաքացու միավորները դեռևս կուտակված չեն։
Նախարարությունից «Ալիք մեդիային» հայտնեցին, որ միավորները կմուտքագրվեն փուլ առ փուլ, քանի որ ծրագրի շահառու է հանդիսանում 300 հազար ֆերմեր, իսկ այս պահի դրությամբ աջակցությունը փոխանցվել է 40 հազար ֆերմերի։
Հիշեցնենք, որ մայիսի 10-ին Վրաստանում մեկնարկել է ֆերմերների աջակցության ծրագիրը։ Քաղաքացիները կարող են դիմել Liberty բանկի ցանկացած մասնաճյուղ` քարտ ստանալու համար, որի միջոցով պետությունը մոտակա ժամանականերում կփոխանցի 300 լարիին համարժեք միավորներ։ Այն ֆերմերները կկարողանան օգտագործել գյուղատնտեսական գործունեության նպատակով անհրաժեշտ ապրանքներ ձեռք բերելու համար:
