Առողջապահության փոխնախարար Թամար Գաբունիան հայտնել է, որ Վրաստանում կորոնավիրուսով վարակման դեպքերի թիվը զգալիորեն նվազում է:
Վրաստանի իմունիզացիայի խորհուրդը թույլատրել է 12 տարեկան և բարձր տարիքի երեխաների համար կորոնավիրուսի դեմ խթանիչ՝ booster դոզայի կիրառումը։
Մայիսի 6-ի դրությամբ Վրաստանում չափահաս բնակչության 44 տոկոսը կամ 1 մլն 264 հազար 740 քաղաքացի պատվաստվել է կորոնավիրուսի դեմ պատվաստանյութի երկու դոզայով, ավելին՝ այստեղ:
Վրաստանի Հիվանդությունների վերահսկման ազգային կենտրոնի տնօրեն Ամիրան Գամկղրելիձեն ասել է. «Թենգիզ Ցերցվաձեն հրաժարական չի տա, նա այնքան մեծ հայրենասեր է՝ երկրի, իր աշխատանքի, իր համակարգի, որ չեմ կարծում, որ նա նման որոշում կայացնի»:
Վրաստանը լրացրել է նաև ԵՄ անդամակցության հարցաշարի երկրորդ մասը։
Վրաստանի արտաքին գործերի նախարար Իլիա Դարչիաշվիլին հեռախոսազրույց է ունեցել Իսրայելի արտաքին գործերի նախարար Յաիր Լապիդի հետ: Հեռախոսազրույցի ընթացքում նախարարներն ընդգծել են Վրաստանի և Իսրայելի պատմական սերտ բարեկամությունը և քննարկել երկու երկրների միջև գործընկերության հետագա զարգացման հեռանկարները։ Նախարարներն ընդգծել են երկրների միջև տնտեսական համագործակցության մեծ ներուժը։
Կովկասում և Կենտրոնական Ասիայում ՆԱՏՕ-ի հատուկ ներկայացուցիչ Խավիեր Կոլոմինան ասել է, որ Վրաստանում բարեփոխումների գործընթացը կանգ է առել արդեն մեկուկես տարի: Կոլոմինայի խոսքով՝ ՆԱՏՕ-ն շատ գոհ է Վրաստանի հետ երկկողմ հարաբերություններից և գործնական համագործակցությունից։ Սակայն, ըստ նրա, այս ֆոնին Դաշինքը մտահոգված է Վրաստանից պահանջվող բարեփոխումների իրականացման մակարդակով։
«Ռազմավարություն Աղմաշենեբլիի» ընդդիմադիր կուսակցության ղեկավար Գիորգի Վաշաձեն վստահեցնում է՝ Վրաստանում արտահերթ ընտրություններ են սպասվում, քանի որ «Վրացական երազանքը» գնալով ավելի արմատական է դառնում։
«Միացյալ ազգային շարժում» ընդդիմադիր կուսակցությունը ցույց է անցկացրել Ռուսթավիի բանտի դիմաց՝ հաջակցություն նախկին նախագահ Միխեիլ Սաակաշվիլիի։ Մանրամասն՝ այստեղ:
Ընդդիմադիր «Միացյալ ազգային շարժման» անդամները Բաթումիի Ռուսթավելի փողոցում հանրահավաք են անցկացրել և երթով շարժվել դեպի Աջարիայի կառավարության շենք, որտեղ հանրահավաք են անցկացրել Միխեիլ Սաակաշվիլիին ազատ արձակելու և նրան բուժհաստատություն տեղափոխելու պահանջով։ Բաթումիում «Միացյալ ազգային շարժման» առաջնորդ Գիորգի Կիրթաձեի խոսքով՝ իրենք ամեն օր բողոքի ցույցեր են անցկացնելու՝ ի պաշտպանություն Վրաստանի երրորդ նախագահի։
Վրաստանի խորհրդարանի շրջակա միջավայրի և բնական ռեսուրսների հանձնաժողովի նախագահ Մայա Բիթաձեն հայտարարել է, որ Թբիլիսիի լուսացույցները կփոխվեն և դրանց թիվը կեռապատկվի։
Վրաստանի կողմից չվերահսկվող Աբխազիայի դե ֆակտո արտաքին գործերի նախարարության հայտարարությամբ՝ «Օկուպացված տարածքների մասին» Վրաստանի օրենքը խոչընդոտում է Աբխազիայի արտաքին շփումներին, ավելին՝ այստեղ:
Ռուսաստանի Դաշնության սպորտի փոխնախարար Օդեսա Բեյսուլթանովը հանդիպել է Վրաստանի կողմից չվերահսկվող Աբխազիայի դե ֆակտո սպորտի պետական կոմիտեի նախագահ Ջեմալ Գուբազի հետ:
Եվ վերջում՝ մայիսի 6-ի սակարկությունների արդյունքում Վրաստանի ազգային արժույթը ԱՄՆ դոլարի նկատմամբ ամրապնդվել է 0,80 թեթրիով, ինչի արդյունքում մեկ դոլարի դիմաց պաշտոնական արժեքը կազմել է 3,0318 լարի։ Ազգային արժույթը եվրոյի նկատմամբ ամրապնդվել է 0,88 թեթրիով, ինչի արդյունքում մեկ եվրոյի պաշտոնական արժեքը դարձել է 3,2110 լարի։
