Ադրբեջան կատարած պաշտոնական այցի շրջանակներում Վրաստանի արտգործնախարար Իլիա Դարչիաշվիլին հանդիպել է Ադրբեջանի նախագահ Իլհամ Ալիևի հետ։ Տեղեկությունը տարածում է Վրաստանի արտաքին գործերի նախարարությունը (ԱԳՆ)։
Ըստ ԱԳՆ-ի՝ հանդիպման ժամանակ կողմերը վերահաստատել են երկու երկրների միջև ավանդական սերտ բարեկամությունը և ռազմավարական գործընկերությունը։ Վրաստանի արտաքին գործերի նախարարը հատկապես ընդգծել է նախագահ Ալիևի անձնական ներդրումը երկու երկրների միջև սերտ գործընկերության և բարեկամության խորացման գործում։
«Կողմերը նշել են տարբեր ոլորտներում Վրաստանի և Ադրբեջանի միջև համագործակցության կարևորությունը տարածաշրջանում կայունության և զարգացման ապահովման համար և դրական են գնահատել այս առումով հաջող իրականացվող համատեղ տնտեսական նախագծերը»,-ասված է տարածած հաղորդագրության մեջ։
Նշվում է, որ քննարկել են նաև աշխարհում և տարածաշրջանում անվտանգության միջավայրը և ընդգծել խաղաղության և կայունության կարևորությունը առկա մարտահրավերների լույսի ներքո։ Վրաստանի արտգործնախարարը շնորհակալություն է հայտնել Ադրբեջանին Վրաստանի ինքնիշխանությանն ու տարածքային ամբողջականությանը աջակցելու համար.
«Ադրբեջանի նախագահի հետ հանդիպմանը կողմերը ողջունել են Վրաստանի և Ադրբեջանի միջև դիվանագիտական հարաբերությունների հաստատման 30-ամյակը»։
Տեղեկության համաձայն՝ Վրաստանի արտգործնախարարը պաշտոնական այցը Ադրբեջան սկսել է ազգային առաջնորդ Հեյդար Ալիևի գերեզմանին ծաղկեպսակ դնելով։
