Ուկրաինայի լրագրողների ազգային միության տվյալներով՝ Ուկրաինայում փետրվարի 24-ից Ռուսաստանի սանձազերծած պատերազմի մեկնարկից ի վեր տուժել է 20 լրագրող։ Տեղեկությունը հաստատել է Ուկրաինայի գլխավոր դատախազությունը։

Իրենց մասնագիտական պարտականությունները կատարելիս զոհվածների անունների հրապարակումից պարզ է դառնում, որ նրանց թվում կան ինչպես միջազգային, այնպես էլ ուկրաինացի լրագրողներ։

Միության տվյալներով՝ չեն կարող կապ հաստատել նաև մի քանի այլ լրագրողների հետ և տեղեկություն չունեն նրանց վիճակի մասին։

Լրագրողների պաշտպանության կոմիտեի մարտի 23-ի տվյալներով՝ Ուկրաինայում սպանվել է 7 լրագրող։

Նշենք, որ փետրվարի 24-ի առավոտյան Ուկրաինայի դեմ Ռուսաստանի սկսած պատերազմը շարունակվում է առ այսօր։

Ուկրաինայի իշխանությունների փոխանցմամբ՝ պատերազմն արդեն խլել է հազարավոր խաղաղ բնակիչների կյանքեր։ Զոհվել է 191 երեխա, ավելի քան 349-ը վիրավորվել է։ Պաշտոնական տվյալներով՝ ամենաշատը՝ 113 երեխա տուժել է Դոնեցկի շրջանում։