Թբիլիսիի քաղաքապետ Կախա Կալաձեի խոսքով՝ կբացվի գանձապետական հաշիվ, որտեղ քաղաքացիները կկարողանան գումար փոխանցել Ուկրաինային օգնելու համար։
«Հաշվի առնելով այն հանգամանքը, որ շատ մարդիկ ակտիվ են, բիզնես հատվածը հատկապես պատրաստ է օգնել ուկրաինացի ընկերներին, մենք որոշեցինք բացել հաշիվ, որտեղ հնարավոր կլինի ֆինանսական օգնություն ցուցաբերել։ Իհարկե, ես ևս պատրաստ եմ մասնակցել այս օգնությանը։ Խաղաղություն եմ մաղթում Ուկրաինային»,- ասել է Կալաձեն՝ հավելելով, որ այս պատերազմը ճնշող է բոլորի համար։
Քաղաքապետի խոսքով՝ Թբիլիսիում արդեն կան վայրեր, որտեղ քաղաքացիները կարող են Ուկրաինայի համար մարդասիրական օգնության թողնել.
«Այս դժվար պահին, մեր հնարավորությունների սահմաններում, կշարունակենք աջակցել ուկրաինացի ժողովրդին։ Մեր պետությունը պատերազմի առաջին օրերից օգնում է Վրաստանում մնացած Ուկրաինայի քաղաքացիներին»։
Կալաձեն շնորհակալություն է հայտնել բոլոր այն մարդկանց, ովքեր ներգրավված են այս գործընթացում։
