Փետրվարի 9-ին Վրաստանում կորոնավիրուսով վարակման ընդհանուր թիվը հասավ 1 375 615-ի: Մեկ օրում արձանագրվել է 25 161 նոր դեպք: Դրականության օրական ցուցանիշը կազմում է 34.66%:
Վրաստանի խորհրդարանի նախագահ Շալվա Պապուաշվիլիի գլխավորած պատվիրակությունը փետրվարի 9-ին պաշտոնական հանդիպումներ է սկսել Լոնդոնում։ Շալվա Պապուաշվիլին հանդիպումներ կունենա Մեծ Բրիտանիայի խորհրդարանի Համայնքների պալատի խոսնակ Լինդսի Հոյլի, Լորդերի պալատի խոսնակ Ջոն Մաքֆոլի, ինչպես նաև Ներկայացուցիչների պալատի արտաքին հարաբերությունների և պաշտպանության հանձնաժողովների անդամների հետ:
Երեկ Վրաստանի Էկոնոմիկայի և կայուն զարգացման նախարար Նաթիա Թուրնավան հրաժարական է տվել։ Թուրնավային էկոնոմիկայի և կայուն զարգացման նախարարի պաշտոնում կփոխարինի շրջակա միջավայրի պահպանության և գյուղատնտեսության ներկայիս նախարար Լևան Դավիթաշվիլին։ Նաթիա Թուրնավան չի մանրամասնել, թե որտեղ է շարունակելու իր գործունեությունը:
Պարզ դարձավ, որ Վրաստանի Ազգային բանկը սկսում է Գիորգի 5-րդի (Բրծկղինվալե-Պայծառ) անվան մետաղադրամների նախնական պատվերների ընդունումը։ «Վրաստանի թագավորները» շարքի մաս կազմող մետաղադրամները նախատեսվում է թողարկել 2023 թվականին, որից հետո էլ հայտնի կդառնա դրանց ճշգրիտ արժեքը։
Փետրվարի 9-ի պաշտոնական փոխարժեքով, որն ուժի մեջ կմտնի փետրվարի 10-ից, լարին երկշաբաթյա ամրապնդումից հետո դոլարի նկատմամբ արժեզրկվել է 1,31 թեթրիով: Փետրվարի 10-ին 1 ԱՄՆ դոլարի արժեքը կկազմի 2,9331 լարի։
Վրաստանում 2019-ի համեմատ աճել է միջին աշխատավարձը: Ամենամեծ աճը գրանցվել է ֆինանսների և անվտանգության ոլորտում:
Վրաստանի խորհրդարանի առողջապահության հանձնաժողովի նիստում քննարկվել է ծխախոտի տուփերի ստանդարտացված փաթեթավորման հարցը։ Առանց ստանդարտացված փաթեթավորման ծխախոտի վաճառքը պետք է արգելվի 2023 թվականի հունվարի 1-ից։ Խոսքը վերաբերում է ծխախոտի արտադրանքի գրավչության նվազեցմանը, առողջությանը սպառնացող վտանգների մասին նախազգուշացումներին։
«Հանրակրթության մասին» օրենքում կատարված փոփոխությունների համաձայն այսուհետ Վրաստանում «փնտրող» ուսուցչի կարգավիճակ ստանալ կարող են նաև նրանք, ովքեր արվեստի կամ սպորտի բնագավառում մասնագիտական կրթությունը հաստատող վկայական ունեն։ Ավելին՝ այստեղ:
Ծալկայի կիրճում (Դաշբաշի կիրճ) էկոզբոսաշրջային վայրը կբացվի այս տարվա մայիսին։ Նախագծի վրա աշխատում է իսրայելական Kass Land ընկերությունը։ «Շինարարական աշխատանքների մեծ մասն ավարտված է։ Այս փուլում կատարվում են արտաքին հարդարման աշխատանքներ»,- նշել է ընկերության տնօրենը Եկատերինե Թորդիան։
Երեկ՝ փետրվարի 9-ին Թբիլիսիի քաղաքային դատարանում շարունակվել է Վրաստանի երրորդ նախագահ Միխեիլ Սաակաշվիլիի հերթական դատավարությունը։ Դատավարության ժամանակ աղմուկ է բարձրացել, Սաակաշվիլին էլ ասել է, թե կլքի դահլիճը։
«Ինձ մեղադրում են պետական միջոցների յուրացման մեջ»,- ասել է Սաակաշվիլին՝ ցուցադրելով լուսանկարներ, որոնցում ըստ նրա, վարչապետ Իրակլի Ղարիբաշվիլիի, Էներգետիկայի և ջրամատակարարման կարգավորման ազգային հանձնաժողովի նախագահ Դավիթ Նարմանիայի ու գլխավոր դատախազ Իրակլի Շոթաձեին պատկանող տներն են։
Վրաստանյան «Բաց հասարակության հիմնադրամ», «Թրանսփարենսի Ինթերնեշնլ-Վրաստան», «Արդար ընտրություններ» և «Վրաստանի դեմոկրատական նախաձեռնություն» կազմակերպությունները զեկույց են հրապարակել, ըստ որի՝ Եվրոպական խորհրդի նախագահ Շառլ Միշելի փաստաթղթով նախատեսված արդարադատության բարեփոխումները ձախողվել են:
Մարդու իրավունքների եվրոպական դատարանը սկսել է քննել 2008 թվականի օգոստոսյան պատերազմի վերաբերյալ անհատական բողոքներն ընդդեմ Ռուսաստանի: Վրաստանի երիտասարդ իրավաբանների ասոցիացիան հայտնում է, որ ընդհանուր առմամբ 53 բողոք է ուղարկվել Ստրասբուրգ՝ պատերազմի ընթացքում Ռուսաստանի կողմից Մարդու իրավունքների եվրոպական կոնվենցիայի դրույթների խախտման վերաբերյալ։
Թբիլիսիի քաղաքապետ Կախա Կալաձեի խոսքով՝ տաքսիների բարեփոխման երրորդ փուլի շրջանակներում նախատեսված փոփոխություններով որոշ տաքսիների կթույլատրվի կանգ առնել ավտոբուսների կանգառի գոտում՝ ուղևորներ վերցնելու և իջեցնելու համար։
Սա վերաբերում է միայն A կատեգորիայի տաքսիներին, որոնք միայն սպիտակ են, ձախ ղեկով, ծառայություններ մատուցելիս օգտագործում են «TAXI Tbilisi» վառ սպիտակ և սև մակագրությամբ նշան, ինչպես նաև տաքսի ծառայության թույլտվություն ունի ուղևորների համար տեսանելի վայրում։ Մյուս տաքսիները, այդ թվում՝ հավելվածով աշխատող տաքսիները, չեն ունենա այս առավելությունը։
Վրաստանի Վարչապետ Իրակլի Ղարիբաշվիլին Օթար Դանելիային նշանակել է բիզնես օմբուդսմեն։ Իրակլի Ղարիբաշվիլին ընդգծել է, որ բիզնեսի աջակցությունը Վրաստանի կառավարության առաջնահերթությունն է, և ոլորտը կունենա առավելագույն աջակցություն, քանի որ բիզնեսի զարգացումը նախապայման է տնտեսական աճի և աշխատատեղերի ստեղծման համար։
Վարչապետը, ըստ կառավարության վարչակազմի, կոնկրետ հանձնարարականներ է տվել Բիզնեսի օմբուդսմենին՝ նշելով բիզնեսի հետ բաց համագործակցության, ավելի քիչ խոչընդոտների և հնարավորինս քիչ բյուրոկրատիայի կարևորությունը։ Հանդիպմանը նաև ընդգծվել է բիզնեսի կողմից հանրային ծառայություններից օգտվելու առավելագույն հասանելիության կարևորությունը:
Աշխատանքային այցով Ռուսաստանում գտնվող Վրաստանի կողմից չվերահսկվող Աբխազիայի դե ֆակտո արտգործնախարար Ինալ Արձինբան հանդիպել է ՄԱԿ-ի ասոցիացիաների համաշխարհային ֆեդերացիայի անդամ Ալեքսեյ Բորիսովի հետ և նրա միջոցով խնդրանք ուղղել ՄԱԿ-ի գլխավոր քարտուղար Անտոնիո Գուտերեշին։
Մասնավորապես, Ինալ Արձինբան դիմել է Գուտերեշին՝ խնդրելով Աբխազիային տրամադրել ՄԱԿ-ում պետական դիտորդի կարգավիճակ, ինչը նրան թույլ կտա մասնակցել ՄԱԿ-ի Գլխավոր ասամբլեայի քննարկումներին։
