Համաշխարհային տնտեսական ֆորումի վեբ-կայքում հրապարակված քարտեզի վրա Վրաստանի կողմից չվերահսկվող Աբխազիան և Հարավային Օսիան ընդգրկված են ինքնիշխան երկրների ցանկում: Տեղեկատվությունը հաստատող քարտեզը տարածել է խորհրդարանական փոքրամասնության անդամ Գիգի Ծերեթելին:
«Այս քարտեզը պատահաբար տեսա Համաշխարհային տնտեսական ֆորումի կայքում և այլուր, այստեղ ներկայացվում է 2015 թվականի համաշխարհային բնակչության քարտեզագրությունը: Իսկապես լավ տեղեկատվական քարտեզ է, լուրջ կազմակերպության կողմից ստեղծված, սակայն վատն այն է, որ Աբխազիան և Հարավային Օսիան ինքնիշխան երկրների ցանկում են: Ավելի վատն այն է, որ Վրաստանի կառավարությունը չի արձագանքում դրան: Շատ վատ է, եթե չգիտի, սակայն էլ ավելի վատ է, որ ոչինչ չի անում» ,-հայտարարել է Գոգի Ծերեթելին:
Խնդրին արձագանքել է Վրաստանի արտաքին գործերի նախարարությունը: ԱԳՆ-ը ժխտել է այդ տեղեկատվության իսկությունը, նշելով, որ Համաշխարհային տնտեսական ֆորումի ներկայացուցիչների փոխանցմամբ` հոդվածը գրվել է անկախ հեղինակի կողմից, ով չի համարվում Համաշխարհային տնտեսական ֆորումի անմիջական աշխատակից կամ ֆորումի կողմից վարձու աշխատող: Նախարարության անդրադարձում ` հոդվածում օգտագործված քարտեզը ներկայացնում է բացառապես հեղինակի կարծիքը:
