«Վրացական երազանք»-ի կառավարության արտաքին գործերի նախարար (ԱԳ) Մակա Բոճորիշվիլին Անթալիայի դիվանագիտական ֆորումի ժամանակ հայտարարել է, որ Վրաստանը չի դիտարկում «3+3» ձևաչափին մասնակցելու հնարավորությունը, քանի որ երկրի երկու շրջանները օկուպացված են Ռուսաստանի կողմից։
Ուշագրավ է, որ Բոճորիշվիլիի հայտարարությանը նախորդել էր «Վրացական երազանք»-ի միակուսակցական խորհրդարանի առաջին փոխնախագահ Գիա Վոլսկիի հայտարարությունը. Վոլսկին փետրվարին ասել էր, թե ներկայում չկա որևէ շարժառիթ, որը կհիմնավորի Վրաստանի ներգրավվածությունը «3+3» ձևաչափում, թեև դա չէր բացառել ապագայում։
«Մենք համագործակցում ենք մեր բոլոր հարևանների հետ, բացի Ռուսաստանից», — ասել է Բոճորիշվիլին:
Ֆորումի քննարկումներից մեկի համակարգողը Բոճորիշվիլիին հարցրել էր, թե արդյոք Վրաստանը մտադի՞ր է վերանայել իր որոշումը և միանալ «3+3» ձևաչափին, որի ստեղծման նախաձեռնությունը հայտարարել էր Թուրքիայի նախագահ Էրդողանը 2020 թվականի դեկտեմբերին։ Էրդողանի նախաձեռնությունը ենթադրում է Հարավային Կովկասում Թուրքիայի, Ռուսաստանի, Իրանի, Ադրբեջանի, Հայաստանի և Վրաստանի մասնակցությամբ «տարածաշրջանային համագործակցության նոր հարթակ՝ ամուր խաղաղության և կայունության ապահովման համար» (3+3) ստեղծելու նախաձեռնության մասին։ Դա տեղի է ունեցել Բաքվում Ադրբեջանի նախագահ Իլհամ Ալիևի հետ հանդիպումից հետո, որին նախորդել էր Ադրբեջանի և Հայաստանի միջև համաձայնագիրը Լեռնային Ղարաբաղում ռազմական գործողությունների դադարեցման մասին:
Վրաստանի պաշտոնական դիրքորոշումն ի սկզբանե եղել է այն, որ մտադիր չէ մասնակցել այդ նախաձեռնությանը։ Ձևաչափի շրջանակներում առաջին հանդիպումը կայացել է 2021 թվականին Մոսկվայում, երկրորդը՝ Թեհրանում 2023 թվականին, երրորդը՝ Թուրքիայում։
Վերջին տարիներին «Վրացական երազանք»-ի ակտիվ հակաարևմտյան հռետորաբանության և եվրաինտեգրման ուղուց շեղվելու պայմաններում Մոսկվայում Վրաստանի հետ դիվանագիտական հարաբերությունների վերականգնման հույսեր ունենալը վրացի որոշ փորձագետներ թակարդ են անվանում: Ասում են՝ Մոսկվան պարբերաբար նման հայտարարություններով փաստում է, որ «Վրացական երազանք»-ի պատճառով երկրում տիրող իրավիճակի թիկունքում ռուսական ազդեցությունն է:
