Մեկ տարվա ընդմիջումից հետո «Վրաստանի հայ համայնք» կազմակերպությունը ապրիլի 23-ին Թբիլիսիում Ջահերով երթ իրականացրեց: Հայոց ցեղասպանության 102-րդ տարելիցին կազմակերպված Ջահերով երթը սկիզբ առավ Թբիլիսիի Վակե թաղամասի Հաղթանակի զբոսայգուց, ապա անցավ կենտրոնական Ճավճավաձե պողոտայով մինչեւ Թուրքիայի դեսպանատուն: Ջահերով, մոմերով, Հայաստանի և Վրաստանի պետական դրոշներով, ճանաչում, դատապարտում, հատուցում վանկարկելով` ցուցարարները պողոտայի մայթերով 15 րոպե տեւողությամբ երթ իրականացրին:
«Ցեղասպանությունը պետք է ճանաչվի և դատապարտվի, որպեսզի այն չկրկնվի, այսօր մենք հենց այդ ճանաչմանը հասնելու նպատակով ենք կազմակերպել երթը»,- Ալիքի հետ զրույցում ասաց «Վրաստանի հայ համայնք» կազմակերպության տեղեկատվական բաժնի պատասխանատու Ալեքսանդր Օհանյանը:
Արդեն Թուրքիայի դեսպանատան հարակից տարածքում, երթի մասնակիցները փոքր հանրահավաք անցկացրեցին, որի ընթացքում ելույթներ հնչեցին հայերեն եւ վրացերեն լեզուներով: Ցուցարարները կոչով դիմեցին նաև Վրաստանի կառավարությանը. «Մի կողմ դնել Թուրքիայի ու Ադրբեջանի հետ ունեցած հարաբերությունների կարեւորությունը եւ ընդունել ու դատապարտել հայոց ցեղասպանությունը»: Ցույցի մասնակիցները, երգեցին նաեւ Գետաշեն երգը: Ջահերով երթի անվտանգությունն էին ապահովում տասնյակ ոստիկաններ, ներկա էին նաեւ Վրաստանի մարդու իրավունքների պաշտպանի գրասենյակի ներկայացուցիչներ:
Հիշեցնենք, որ անցյալ տարի, հայոց ցեղասպանության 101-րդ տարելիցին նվիրված մի շարք միջոցառումներ, այդ թվում նաև Թբիլիսիում 2007 թվականից կազմակերպվող Ջահերով երթը չէր իրականացվել` հաշվի առնելով Վրաստանի իշխանությունների մտահոգությունը, դիրքորոշումը և հորդորը, սպասվելիք հնարավոր սադրանքների վերաբերյալ:
Այս տարի եւս, Թբիլիսիի քաղաքապետարանը նպատակահարմար չէր համարել Ջահերով երթի անցկացումը` պատճառաբանելով, թե քաղաքի կենտրոնական պողոտայում նման միջառման անցկացումը կարող է խոչընդոտել երթեւեկությանը: Նշենք նաեւ, որ ի տարբերություն նախորդ տարիների, այս տարի երթին ներկա չէին հայ առաքելական եկեղեցու Վիրահայոց թեմի հոգևորականներ, համայնքային կառույցների ղեկավարներ:
