Ծանոթանալ ռազմական լրատվության առանձնահատկություններին, յուրացնել պատերազմական պայմաններում աշխատելու հմտությունները, տարբերել ստույգ տեղեկատվությունը` ապատեղեկատվությունից:
Սրանք էին Վրաստանի ՊՆ-ի կողմից հուլիսի 1-ից 5-ը կազմակերպված «Արժանի պատասխան 2016» խորագիրը կրող նախագծի գլխավոր նպատակները: Վրաստանի արևմուտքում գտնվող` Սենակի քաղաքի երկրորդ հետևակային բրիգադի ռազմաբազայում կազմակերպված դասընթացին մասնակցում էին երկրում գործող ավելի քան 10 հեղինակավոր մամուլի միջոցների 20-ից ավելի ներկայացուցիչներ: Դասընթացի կազմակերպիչների թվում էին նաև կիբեռանվտանգության փորձագետներ, հոգեբաններ, ռազմական լրատվության ոլորտում փորձառու լրագրողներ, ինչպես նաև Ուկրաինայի ՊՆ-ից հրավիրված աշխատակիցներ:
Լրագրողները ծանոթացան անվտանգության կանոններին, սովորեցին առաջին օգնություն ցուցաբերել, ընտելացան միջավայրին, զինվորական կյանքի ու կարգապահության առանձնահատկություններին: Մասնակիցները դեռևս չէին գիտակցում, թե ինչ փորձություններ են սպասվում հաջորդ օերրին:
Դասընթացների մասնակից, Ախալցիխեի «Իմպերիա 9-րդ ալիք» հեռուստառադիոընկերության լրագրողը, ով անցել էր 2008 թվականի պատերազմով, որպես զինվորական կիսվեց իր տպավորություններով. «Այս հինգ օրերի ընթացքում պատերազմական պայմաններում աշխատելու շատ կարևոր փորձ ձեռք բերեցի: Ափսոս, որ ավելի երկար չտևեց: Հուսով եմ` նախագիծը կշարունակվի և հնարավորության դեպքում անպայման նորից կմասնակցեմ: Խորին շնորհակալություն եմ ուզում հայտնել բոլոր նրանց, ովքեր մասնակցել են այս յուրօրինակ նախագծի ստեղծմանն ու իրագործմանը»:
Վրաստանի պաշտպանության նախարարության վերլուծական վարչության ղեկավար Ռատի Շարտավայի կարծիքով` այս դասընթացն անցած լրագրողները պատերազմի դեպքում ավելի իրազեկ ու պատրաստ կլինեն. «Իմ կարծիքով` ամեն ինչ անցկացվեց բարձր մակարդակով: Դա կհաստատեն նաև մասնակիցները: Ստեղծվել էին տեղեկատվական պատերազմի բոլոր պայմանները: Վրաստանում առաջին անգամ է տեղի ունենում նմանատիպ դասընթաց, որտեղ ներգրավված էին և զինված ուժերը և լրատվամիջոցները: Հատկանշական է նաև լրագրողների աշխատանքային պրոֆեսիոնալիզմը: Աստված մի արասցե, եթե հայտնվենք պատերազմական պայմաններում, մեր լրագրողները առավել իրազեկ կգտվեն»:
«Accent» լրատվականի լրագրող Դիանա Մուսելիանին գտնում է, որ ստեղծված պայմաններում ռազմական լրագրողները պետք է լավ պատրաստված լինեն. «Հատկապես հետաքրքիր էին վերջին օրերը, երբ արդեն ներգրավված էինք ռազմական գործողություններում: Մեծ էր ֆիզիկական ծանրաբեռնվածությունը, մասնավորապես դժվար էր զրահաբաճկոններով աշխատելը: Լավ կլինի հետագայում շարունակվի այս նախագիծը և շեշտը դրվի անվտանգության նորմերի պահպանման վրա: Մեծ հաճույքով կմասնակցեմ հետագա ծրագրերեին, չէ որ ապրում ենք այնպիսի պայմաններում, երբ անկանխատեսելի է վաղվա օրը»:
Դասընթացի կազմակերպիչներից Դավիթ Ձիձիշվիլիի կարծիքով` կատարելագործելու դեռ շատ տեղ կա. «մենք փորձում էինք տեղեկատվական պատերազմի, քարոզչության և պատերազմական գործողությունների` այսպես ասած բեմադրությամբ փոխանցել լրագրության այս ոլորտի փորձն ու հմտությունները: Կարծում եմ` բավականին լավ անցավ, սակայն կատարելագործելու դեռ շատ բան կա: Հուսով եմ` մյուս տարիներին այս ծրագիրը կշարունակվի և կկարողանանք առավել հետաքրքիր և ինֆորմատիվ միջոցառումներ կազմակերպել»:
Դասընթացներին հյուրընկալվել էր նաև Վրաստանի պաշտպանության նախարար Թինա Խիդաշելին: «Մենք այժմ զբաղված ենք լրագրողների պահուստային խմբի ստեղծմամբ: Դա նախարարության քաղաքականության մի մասն է կազմում: Քանի որ հիբրիդային պատերազմները հաճախակի են դարձել, մեծացել է նաև տեղեկատվական պատերազմի դերը և դա յուրաքանչյուր երկրի համար ամենամեծ մարտահրավերներից մեկն է: Մենք փորձում ենք օգնել վրացական մեդիային` հաղթահարելու այդ մարտահրավերները»:
Այսպիսով բերմադրված պատերազմն ավարտվեց: Միջոցառման ավարտին բոլոր լրագրողներն ու օպերատորները, այդ թվում Ալիքի ներկայացուցիչները վկայականներ ստացան:
