Վրաստանի իշխող՝ «Վրացական երազանք-ժողովրդավարական Վրաստան» կուսակցությունը հրապարակել է ընտրական ցուցակն ու ծրագիրը: Կուսակցության ղեկավար, վարչապետ Գիորգի Կվիրիկլաշվիլին ներկայացնելով ընտրացուցակը, ասել է.
«Մենք մեր խոսքով եւ արարքով ապացուցել ենք, որ այն քաղաքական ուժն ենք, որը Վրաստանում կարող է վերջ դնել հակամարտություններին ու տարձայնություններին` միավորելով հանրությունը նույն ծրագրերի շուրջ: Մենք ուզում տեսնել մեր հանրությունը կարծիքների բազմազանությամբ, բայց միևնույն ժամանակ սիրով միավորող»:
Վարչապետի խոսքով «Վրացական երազանք» ընտրական ծրագիրը բաղկացած է 4 հիմնական կետից: «Բիզնեսի եւ արդյունաբերության զարգացումը մեր գործունեության անկյունաքարն է լինելու» ,- ասել է Կվիրիկաշվիլին: Նա նշել է, որ կուսակցությունը հետագա տարիներին եվս լինելով իշխանության ղեկին, արագորեն ապահովելու է տնտեսական աճ, մեծ ուշադրություն է դարձնելու սոցիալական զարգացման, ազատության եւ ժողովրդավարության առկայությանն ու պարգմատիկ արտաքին քաղաքականությանը:
Կուսակցության ընտրական ծրագրի առաջին մասում ներկացվում է տարբեր ոլորտներում բոլոր այն բարեփոխումները, որ սկսել են իրականացվել վերջին չորս տարիներին, իսկ երկրորդ մասում՝ առաջիկա անելիքները:
Ըստ ծրագրի՝ մինչ օրս արմատապես փոխվել է Քրեական օրենսգիրքը, պատիժնեի իականացման համակարգը, վերականգնվել է արդարությունը: Ծրագրում նշված է նաեւ, որ ազատ են երկրում գործող ԶԼՄ-ներն ու խոսքը:
«Վրացական երազանք»-ի ծրագրում հատուկ կետ է հատկացրել ազգային փոքրամասնությունների վերաբերյալ հարցերին` հենվելով «քաղաքացիական հավասարության եւ ինտեգրման պետական ռազմավարությունը եւ 2015-20 թթ աշխատանքային ծրագրի» վրա: Նրանում ասվում է, որ երկրում ապրող էթնիկ տարբեր խմբերի ներկայացուցիչներին հուզող հարցերը կարգավորվելու են. «լավագույն պրակտիկայի շնորհիվ: Մեծ մասամբ շեշտը դրվել ու շարունակվելու է լինել կրթության վրա: Բարձրացել է էթնիկ փոքրամասնությունների՝ պետական լեզվի իմացության մակարդակը դպրոցներում»:
Իշխող կուսակցությունն հիշեցնում է, որ արդեն 90 դպրոցներում բացել է վրաց լեզվի ակումբներ, որից օգտվում են ավելի քան 2600 աշակերտ, մինչեւ 500 ուսուցիչ եւ 400-ից ավելի տեղական համայնքի անդամ: Վրաց լեզվի 78 ուսուցիչ ուղարկվել է Սամցխե-Ջավախեթի, Քվեմո-Քարթլի եւ Կախեթիի ոչ վրացալեզու դպրոցներ: Առաջիկա 4 տարվա ընթացքում «Վրացական երազանք»-ը էթնիկ փոքրամասնություններին հնարավորություն է ընձեռնելու այլ քաղաքացիների հետ միասին առավելագույնս ներգրավված լինելու հանրային կյանքի բոլոր ոլորտներում, երկրի տնտեսական զարգացման մեջ, քաղաքական եւ քաղաքացիական գործընթացներում: Մեծ ուշադրություն է դարձվելու հատկապես վրաց լեզվի իմացությանը: Կուսակցությունն առաջարկում է երկրի հանրային սեկտորում աշխատող էթնիկ փոքրամասնություններին վրաց լեզվի խորացված ուսուցում:
Ինչ վերաբերում է կուսակցության համամասնական ընտրացուցակին, առաջին հնգյակում են կառավարության հայտնի դեմքերը: Ցուցակը գլխավորում է վարչապետ, կուսակցության ղեկավար, (կուսակցության անդամ է 2012 թվականից) Գիորգի Կվիրիկաշվիլին, ով մինչ այս ղեկավարել է Տնտեսության եւ կայուն զարգացման նախարարությունը, Արտաքին գործերի նաարարությունը և այլն:
Նրան հետևում է արդեն նախկին փոխվարչապետ, (կուսակցության անդամ է 2011 թվականից, 1996-2012 եղել է Վրաստանի ֆուտբոլի ազգային ֆեդերացիայի անդամ) Կախա Կալաձեն, ով հիշեցնենք հրաժարականի դիմումը ներկայացրեց ընտրացուցակը հրապարակելուց ժամեր անց: Երրորդ հորիզոնականում ներկայացված Իրակլի Կոբախիձե ն «Վրացական երազանք»-ի գործադիր քարտուղարն է, քաղաքական հարուստ անցյալ չունի:
Հաջորդ տեղում վարչապետի խորհրդական Թամար Չուգոշվիլին է: Կուսակացական ընտրացուցակի հնգյակը եզրափակում է բիզնես-օմբուդսմեն Գիորգի Գախարիան:
Կուսակցության շարքերում են նաեւ ազգային փոքրամասնության երկու ներկայացուցիչ՝ Ռուսլան Պողոսյանն (19-րդ տեղում) ու Մախիր Դարզիեւը (20-րդ տեղում):
«Վրացական երազանք-ժողովրդավարակն Վրաստան» կուսակցությունը ընտրացուցակի և ծրագրի հետ ներկայացրել է նաեւ ընտրական տեսահոլովակ՝ «Իմ Վրաստանն այստեղ է» խորագրով: Տեսահոլովակը նկարահանվել է Գիորգի Ցաբաձեի համանուն երգով: Վրաստանի վարչապետ Գիորգի Կվիրիկաշվիլիի խոսքով, երաժշտական տեսահոլովակի նպատակը «հանրության մեջ դրական էներգիա ստեղծելն է»:
