Վրաստանում դատապարտյալները կարող են բարձրագույն կրթություն ստանալ: Խոսքը ակադեմիական առաջին շեմի` բակալավրի մասին է: Բարձրագույն կրթության իրավունք կունենան այն դատապարտյալները, որոնց պատժի ժամկետը լրանում է, կամ ովքեր մեղավոր են ճանաչվել ոչ ծանր հանցագործություններով: Օրենսդության փոփոխությունների փաթեթն արդեն մշակվում է Պատիժների իրականացման և պրոբացիայի նախարարության կողմից: Տեղեկատվությունը ևս Նախարարությունն է տարածել: Եթե Կառավարությունը հավանություն տա, օրինագիծը կուղարկվի խորհրդարանի հաստատմանը:
ԲՈՒՀ ընդունվելու համար դատապարտյալները մնացած դիմորդների նման պետք է պետական միասնական քննություն հանձնեն: Դատվածներին կրթելու պատրաստ ուսումնական հաստատությունների ցանկը հայտնի կդառնա ավելի ուշ: Առայժմ պարզ չէ նաև, թե ուսումնառության գործընթացն ինչպես է կազմակերպվելու` բանտերում, թե ԲՈՒՀ հաճախելու իրավունք կունենան: Այս պահին բոլոր բանտարկյալները միայն միջնակարգ և մասնագիտական կրթություն ստանալու իրավունք ունեն: Բացի դրանից, բանտերում հասանելի են ուսման կարճաժամկետ կուրսեր, որոնց ավարտին բանտարկյալները համապատասխան վկայական են ստանում:
Ներկայումս տարբեր կրթական ծրագրերում ներգրավված է 1000-ից ավելի բանտարկյալ: Բացի այդ, մինչ այս պահը նրանք հնարավորություն են ունեցել պետական միասնական քննություն հանձնել, սակայն բարձրագույն կրթության իրավունք ստացել են պատիժը կրելուց հետո միայն:
