Վրաստանում ՀՀ դեսպանության, Վիրահայոց թեմի եւ Թբիլիսիում գործող մի շարք հայկական կազմակերպությունների նախաձեռնությամբ ապրիլի 23-ին, մայրաքաղաքի նորակառույց Բիլթմոր հյուրանոցում հայոց ցեղասպանության 102-րդ տարելիցին նվիրված միջոցառում կազմակերպվեց: Վրաստանի խորհրդարանի անդամներից ու պետական պաշտոնյաներից զատ, միջոցառմանը ներկա էին Վրաստանում հավատարմագրված դիվանագիտական առաքելությունների ներկայացուցիչներ: Այսպես` Իսրայելը, Գերմանիան, Հոլանդիան եւ Վատիկանը ներկայացված էին դեսպանների մակարդակով, Ֆրանսիան եւ Հունաստանը դեսպանի պաշտոնակատարի, ԱՄՆ-ի դեսպանատնից միջոցառմանը մասնակցում էին դեսպանության երկու դիվանագետներ: Դահլիճում էր նաեւ ՀՀ արտակարգ եւ լիազոր դեսպանը:
Հայոց ցեղասպանության 102-րդ տարելիցին նվիրված միջոցառմանը ներկա էին հայ առաքելական եկեղեցու Վիրահայոց թեմի հոգեւորականներ, քույր եկեղեցիների ներկայացուցիչներ: Պաշտոնական հատվածը բացեց «Խաղաղության հիմնադրամ»-ի հիմնադիր Գիորգի Թումասյանը, ով ներկայացրեց համաշխարհային գրականությունում եւ միջազգային մամուլում հայոց ցեղասպանության մասին աշխատություններն ու հոդվածները:
Խոսքը շարունակեց Վրաստանի խորհրդարանի՝ Թբիլիսիի հայաշատ Իսանի թաղամասից մեծամասնական պատգամավոր, իշխող «Վրացական երազանք» կուսակցության անդամ Դավիթ Ճիճինաձեն, ով 1915 թվականի իրադարձությունները ցեղասպանություն որակեց: Ալիքի հետ զրույցում պատգամավորը նշեց, որ Վրաստանի հայերի կողմից ընտրված եւ այս կերպ հայ համայնքի վստահությունը ստացած պատգամավորը կիսում է նրանց ցավը:
« 1915 թվականի ողբերգական իրադարձությունները համաշխարհային պատերազմից հետո ամենաարյունալի իրադարձությունն էր: Այն ժամանակ չկար «ցեղասպանություն» եզրը, սակայն այսօր կասեմ իմ` գուցե սուբյեկտիվ կարծիքը, սա` ցեղասպանություն էր»:
Վրաստանի խորհրդարանի 3 հայազգի պատգամավորներից դահլիճում ներկա էր միայն «Վրացական երազանքի» համամասնական ցուցակով ընտրված Ռուսլան Պողոսյանը: Նրա խոսքով, չնայած այն իրողությանը, որ այս տարի Խորհրդարանի նիստերի ընթացքում ինքը չի բարձրացվել ցեղասպանության ճանաչման հարցը, այն քննարկվում է նիստերի դահլիճից դուրս.
«Որպես հայտարարություն այս հարցը չի բարձրացվել, բայց դրա մասին միշտ խոսվում է: Խորհրդարանի աշխատանքը չի ընթանում միայն նիստերի դահլիճում, սա տարված աշխատանքի ընդամենը փոքր մասն է»,- ասաց Ռուսլան Պողոսյանը:
«Վրաց հայրենասերների դաշինք»-ի քաղաքական քարտուղար Գիորգի Մաղլակելիձեն Ալիքի հետ զրույցում նշեց.
«Ցեղասպանությունը, որ ցավոք վերապրել է հայ ժողովուրդը, հարցեր չպետք է առաջացնի, քանի որ ոչ միայն Վրաստանը, այլեւ աշխարհի առաջադեմ երկրները այս փաստը գնահատեցին այնպես ինչպես որ կա: Այսօր արդեն ժամանակն է, որ ոչ միայն հայոց ցեղասպանությունը` այլեւ այլ ողբերգական իրադարձությունները եւս ճանաչվեն»:
Միջոցառումը շարունակվեց երաժշտական հատվածով, ելույթ ունեցան Վիրահայոց թեմի Սբ. Գեւորգ եկեղեցու երգչախմբի սաները, «Հայարտուն» կենտրոնի դուդուկի խմբակը, ինչպես նաեւ Թբիլիսիի Պ. Ադամյանի անվան հայկական պետական դրամատիկական թատրոնի դերասանները:
