Վաղ առավոտից Վրաստանում Շվեյցարիայի դեսպանատան մոտ՝ Վրաստանում Ռուսաստանի Դաշնության հյուպատոսությունում, Վրաստանի բնակիչները ծաղիկներ, խաղալիքներ են տեղադրում ու մոմեր վառում «Կեմերովո, մենք սգում ենք քեզ հետ» գրությամբ պաստառների ներքո՝ այս կերպ հարգելով Ռուսաստանի Կեմերովո քաղաքի «Զիմնյայա Վիշնյա» առևտրի կենտրոնում օրերս տեղի ունեցած, տասնյակ մարդկանց կյանքեր խլած սարսափելի հրդեհի զոհերի հիշատակը։

Թբիլիսիի Ճավճավաձեի պողոտայի 53 հասցեում՝ ՌԴ հյուպատոսությունում, բացվել է նաև ցավակցությունների գիրք, որտեղ կարելի է գրառումներ կատարել մարտի 28-ին և 29-ին ժամը 11-ից 14-ը և 15-ից 18-ը, իսկ մարտի 30-ին՝ ժամը 11-ից 14-ը:

Վրաստանի կողմից զոհվածների հարազատներին և մերձավորներին արդեն ցավակցել են նախագահը, փոխվարչապետ, ՌԴ-ի հետ հարաբերությունների կարգավորման հարցերով նախարար Զուրաբ Աբաշիձեն և այլ բարձրաստիճան այրեր:

Կեմերովո ժամանած ՌԴ նախագահ Վլադիմիր Պուտինը՝ տեղի ունեցածը բնութագրել է որպես հանցավոր անփութություն և ամենաթողություն:

Կեմերովոյի նահանգապետ Աման Տուլեևը հայտարարել է, որ Կուզբասի իշխանությունները զոհվածներից յուրաքանչյուրի ընտանիքին կհատկացնի 1 միլիոն ռուբլի, ինչպես նաև առաջարկել է «Զիմնայա Վիշնյա» առևտրի կենտրոնի սեփականատերերին վարվել նույն կերպ:

Այս գործով ձերբակալվել է 4 մարդ, այդ թվում և առևտրի կենտրոնի կառավարիչը: Ռուսական կողմին ցավակցել են Գերմանիայի և Ավստրիայի կանցլերներ Անգելա Մերկելն ու Սեբաստիան Կուրցը, ԱՄՆ և Մեծ Բրիտանիայի դեսպանները:

Ընդհանուր առմամբ հրդեհի չեզոքացմանը մասնակցել է 660 մարդ: Ըստ պաշտոնական տվյալների՝ զոհվել է 64 մարդ, սակայն ոչ պաշտոնական տվյալներով զոհերի թիվը մի քանի անգամ ավելի է։