Վրաստանի Ներքին գործերի նախարարության արտակարգ իրավիճակների կառավարման ծառայության տեղեկատվությամբ, Բորջոմիի շրջանի Դաբա գյուղի հարակից սարալանջին բռնկված հրդեհը կասեցնելու նպատակով այս պահին ընթանում է հրշեջ-փրկարարների մոբիլիզացիա, դեպքի վայր են տեղափոխում լրացուցիչ տեխնիկա:
Օգոստոսի 21-ի երեկոյան, Բորջոմիի շրջանի Դաբա գյուղում բռնկված հրդեհը քամու պատճառով շարունակել է տարածվել: Հրդեհաշիջման աշխատանքներում ներգրավված է 270 հրշեջ-փրկարար, ովքեր արտակարգ ռեժիմով են աշխատում: Հրդեհը մարելու աշխատանքներում ներգրավված ուղղաթիռները կշարունակեն աշխատել` միջազգային փորձագետների թույլտվության պարագայում: «Ռուսթավի 2» հեռուստաընկերության փոխանցմամբ, Բորջոմիի հրդեհը մարելու նպատակով Ադրբեջանը 1 ուղղաթիռ է տրամադրել: Հաղորդվում է նաեւ Թուրքիայից հնարավոր տեխնիկա ներգրավելու հավանականության մասին:
Վրաստանի վարչապետ Գիորգի Կվիրիկաշվիլին այսօր ուշ երեկոյան ժամանել է Բորջոմի, աղետի կառավարման նպատակով ձեւավորված հատուկ շտաբի նիստին տեղում մասնակցելու: Շտաբի փոխանցմամբ, Դաբա գյուղի բնակիչների էվակուացիայի խնդիր ներկայում չկա, սակայն հրդեհի հետագա տարածման վտանգը առկա է:
Ի դեպ, միեւնույն վայրում մեծ մակերեսով անտառածածկ տարածք էր այրվել 2008-ի օգոստոսյան պատերազմի ժամանակ: Նշված տարածքում վերջին տարիներին վերականգնողական աշխատանքներ էին տարվում:
Հրդեհի պատճառների մասին մանրամասն տվյալներ չեն փոխանցվում, սակայն այդեն իսկ քրեական գործ է հարուցվել ՝ ունեցվածքի ոչնչացում հոդվածով:
