Վրաստանում ԱՄՆ դեսպան Յան Կելլին ևս մեկ անգամ անդրադարձել է «Ռուսթավի 2» հեռուստաընկերության շուրջ ընթացող զարգացումներին։
«Մեր կարծիքով՝ Վրաստանը ժողովրդավարության զարգացման առումով տարածաշրջանի համար վառ օրինակ է: Այնպես, ինչպես մյուս բոլոր ժողովրդավարական երկրներում, Վրաստանում ևս պետք է գոյություն ունենան պարտադիր ցուցիչներ, որոնցից է մամուլի բազմակարծությունը, ազատ խոսքը: Սա ժողովրդավարության զարգացման կարևոր նախապայմաններից է: Մենք հավատում ենք, որ Վրաստանն այս ուղղությամբ էլ ավելի առաջ կընթանա»,- հայտարարել է Յան Կելլին:
Հիշեցնենք՝ Վրաստանի գերագույն դատարանի կողմից օրեր առաջ կայացրած վճռի համաձայն՝ երկրի ամենամեծ ժողովրդականություն վայելող «Ռուսթավի 2» հեռուստաընկերության սեփականության իրավունքն անցնում է Քիբար Խալվաշիին: Ընկերության ղեկավարությունը դիմել է Մարդու իրավունքների Եվրոպական դատարան (ՄԻԵԴ), որը կասեցրել է գերագույն դատարանի կայացրած դատավճռի կատարումը:
Վրաստանում ԱՄՆ դեսպան Յան Կելլին ավելի վաղ լրագրողների հետ զրույցում բացառել է Ստրասբուրգի դատարանի վրա ճնշում գործադրելու հավանականությունը:
